Digwyddiadau

Yma cewch fanylion o'n digwyddiadau diweddaraf - peidiwch ag anghofio edrych ar ein tudalen newyddion am fanylion o beth sy'n mynd ymlaen.

28 Mehefin 2012

Cynhadledd amlddisgyblaeth cyfrwng Cymraeg – Gregynog, 28 Mehefin 2012

Cynhadledd yw hon ar gyfer pawb sydd yn cynnal ac sydd â diddordeb mewn ymchwil academaidd trwy gyfrwng y Gymraeg, beth bynnag yw’r maes a beth bynnag yw’r ddisgyblaeth. Gwahoddir gwyddonwyr, dyniaethwyr a chymdeithasegwyr o bob cwr o Gymru a thu hwnt i rannu ffrwyth eu hymchwil ac i gwrdd ag ymchwilwyr Cymraeg eraill o’r un anian.

Bwriad y gynhadledd yw rhoi cyfle i’r to nesaf o academyddion i dorri eu dannedd ar gyflwyno eu hymchwil gerbron cynulleidfa o gyfoedion. Bydd hefyd yn gyfle i rwydweithio ag ymchwilwyr Cymraeg eu hiaith ac i feithrin cymuned ehangach o academyddion sy'n hyrwyddo darpariaeth cyfrwng Cymraeg yn ein prifysgolion.

Galwad am Bapurau

Gwahoddwn bawb sydd â diddordeb i gynnig cyflwyniad byr neu boster ymchwil.

Dylid anfon unrhyw gynigion ar gyfer papur / poster at Dylan Phillips – d.phillips@colegcymraeg.ac.uk - erbyn Dydd Gwener, 2 Mawrth 2012.

Dylid cyfyngu cynigion i ddim mwy nag un ochr A4.

24-25 Chwefror 2012

Cynhadledd: Mapio Cerddoriaeth Cymru

Cynhelir unfed cynhadledd ar ddeg Canolfan Uwch-Astudiaethau Cerddoriaeth Cymru, Prifysgol Bangor, mewn cydweithrediad â’r Coleg Cymraeg Cenedlaethol a phrosiect Y Cydymaith i Gerddoriaeth Cymru, o hanner dydd, Ddydd Gwener y 24ain o Chwefror hyd at Nos Sadwrn, y 25ain o Chwefror 2012 yn y Drwm, Llyfrgell Genedlaethol Cymru, Aberystwyth. Ffi’r gynhadledd (gan gynnwys lluniaeth) fydd £25 (ac £20 i fyfyrwyr).

Rydym yn chwilio yn benodol am gyflwyniadau ar thema’r gynhadledd, sef Mapio Cerddoriaeth Cymru, ond os hoffech gynnig papur ar UNRHYW agwedd o gerddoriaeth Cymru, i gyfrannu at drafodaeth neu fynychu rhan o’r gynhadledd yn unig, cysylltwch â ni mor fuan â phosib, os gwelwch yn dda. Bydd croeso cynnes i bawb.

Fe fydd y delynores amryddawn Catrin Finch yn perfformio yn y Drwm ar Nos Wener y 24ain o Chwefror. Dim ond nifer cyfyngedig o docynnau fydd ar gael. Maent ar werth o swyddfa docynnau'r Llyfrgell Genedlaethol am £15 (01970 632548).

Y Cydymaith i Gerddoriaeth Cymru / Canolfan Uwch-Astudiaethau Cerddoriaeth Cymru

Ysgol Cerddoriaeth, Prifysgol Bangor, Bangor, Gwynedd  LL57 2DG

Ffôn: 01248 382181 e-bost: tristian.evans@bangor.ac.uk Ffacs: 01248 383895

Rhagfyr 2011

Mae rhifyn diweddaraf Gwerddon, sef Rhifyn 9, bellach wedi ei gyhoeddi.

Cliciwch yma i ddarllen.